ՀԱՅ ՄԱՆՈՒԿՆԵՐԻ 19 ՏՈԿՈՍԸ ԹԵՐԱՃ Է Հ. Հ. ՄԱԿ-ի մանկական հիմնադրամի հայաստանյան գրասենյակի ներկայացուցիչ Հենրիետ Արենսի գնահատմամբՙ Հայաստանում թերասնման հարց կա, եւ դա է պատճառը, որ մեր երկրում երեխաների շրջանում թերաճությունը կազմում է 19 տոկոս: Հայաստանում մինչեւ 5 տարեկան երեխաների 5 տոկոսը թերքաշություն ունի, իսկ 15 տոկոսըՙ գերքաշություն: «Երեխաների շրջանում թերաճության նվազեցման նպատակով ազգային ռազմավարությունների ուժեղացումը» թեմայով տարածաշրջանային աշխատաժողովի ժամանակ Հենրիետ Արենսը շեշտում է, որ եթե ցուցանիշը համեմատենք նախորդ տարիների վիճակագրության հետ, ապա լուրջ առաջընթաց չի նկատվում: «Առաջընթաց չկա նաեւ այն երեխաների թվի առումով, որոնք մինչեւ 6 ամսականը սնվում են բացառապես կրծքի կաթով: Եվ եթե մինչեւ 2005-ը նման երեխաների թիվը եղել է 33 տոկոս, ապա 2010-ինՙ 35 տոկոս: Հայաստանում լուրջ մտահոգության առիթ է նաեւ անեմիայի ցուցանիշը ինչպես նախադպրոցական տարիքի երեխաների, այնպես էլ վերարտադրող տարիքի կանանց շրջանում: Երեխաների շրջանում անեմիայի 37, իսկ կանանցՙ 25 տոկոս է արձանագրվել: | 
