ԴԻԱՐԲԵՔԻՐԻ ՍԲ. ԿԻՐԱԿՈՍ ԵԿԵՂԵՑԻՆ ՊԱՐԳԵՎԱՏՐՎԵԼ Է Հ. Ծ. Ըստ թուրքական «Հուրրիեթ» թերթի տեղեկության, Օսլոյի (Նորվեգիա) քաղաքապետարանի շենքում կայացած պաշտոնական արարողության ընթացքում հրապարակվել են «Մշակութային ժառանգություն-Եվրոպա նոստրա» Եվրոմիության սահմանած 2015 թվի մրցանակակիր հուշակոթողների անունները: Դրանց մեջ է Թուրքիայի հարավարեւելյան մասում գտնվող Դիարբեքիր (Տիգրանակերտ) նահանգի Սբ. Կիրակոս հայկական եկեղեցին, որն այդ մրցանակին է արժանացել լավ պահպանված լինելու անվանակարգում: Տեղացի ժողովրդի ներդրումը պահպանման գործում մեծապես տպավորել է ժյուրիի անդամներին: «Հայկական եկեղեցին պահպանելու ջանքերը Դիարբեքիրի (հայ) բնակչությանը տարագրելուց հետո հաշտեցման արտակարգ գործողություն է», նշել են նրանք իրենց հայտարարության մեջ: Եկեղեցին կառուցվել է 1376 թվին եւ վերանորոգվել 2011-ին: Վերանորոգման աշխատանքներին ազգությամբ քուրդ քաղաքապետի կողքին մասնակցել են նաեւ հայ համայնքի անդամները: «Դա նպաստել է, ըստ ժյուրիի հայտարարության, որ սփյուռքահայ զբոսաշրջիկների այցելությունները ավելանան»: Օսլոյի պաշտոնական արարողություններին մասնակցել են կրթության, մշակույթի, երիտասարդության եւ սպորտի եվրոպական հանձնակատար Թիբոր Նավրասիսը եւ «Եվրոպա Նոստրա» կազմակերպության գործադիր տնօրեն Դենիս դը Կերգորլայը, ով ներկայացրել է կազմակերպության նախագահ Պլասիդո Դոմինգոյին: Վերջինս ընտանեկան հանգամանքների պատճառով ստիպված է եղել ջնջել իր այցելությունը, բայց հատուկ ուղերձով շնորհավորել է բոլոր 30 մրցանակակիրներին: | 
