ՅԵՆԱՅԻ ԽԱՉՔԱՐԸՙ ՈՐՊԵՍ ԳԵՐՄԱՆԱԿԱՆ ՀԱՄԱՊԱՏԱՍԽԱՆԱՏՎՈՒԹՅԱՆ ՄԱՍԻՆ ԽՈՍՏՈՎԱՆՈՒԹՅՈՒՆ ԱՆԱՀԻՏ ՀՈՎՍԵՓՅԱՆ, Գերմանիա Գերմանական Յենա քաղաքում ապրիլի 17-ին, ժամը 11.30-ին Հայաստանից բերված խաչքար կկանգնեցվիՙ ի հիշատակ Հայոց ցեղասպանության 1,5 միլիոն զոհերի, ապրիլի 13-ին ծանուցում է «Օսթթյուրինգեր ցայթունգը»ՙ մանրամասնելով, որ ապրիլի 16-ին, ժամը 19-ին քաղխորհրդի դահլիճում «Նահատակված բանաստեղծներ» վերնագրյալ հուշ երեկո կանցկացվի, որի ընթացքում ելույթի հնարավորություն կտրվի հայ դաշնակահարներին: Հուշաքարը կամփոփի նաեւ առաջին համաշխարհային պատերազմի ժամանակ Օսմանյան կայսրության տարածքում սպանված քրիստոնյա ասորիների, արամեացիների եւ փոքրասիացի հույների հիշատակը: Մոտ 2 մետր բարձրություն ունեցող խաչքարը, որ շաբաթՙ ապրիլի 16-ի երեկոյան կհասնի Յենա, նվիրաբերում է Հալեպում ծնված , հայ եւ հույն ծնողներից սերված, այժմ գերմանաբնակ գործարար Փոլ Գուլօղլուն: Խաչքարն օծելու է Գերմանահայոց առաջնորդ Գարեգին արք. Բեկչյանը, ներկա են լինելու Բեռլինում ՀՀ, Հունաստանի դեսպանները: Թերթը նշում է, թե նման խաչքարեր անցյալ տարի արդեն տեղադրվել են գերմանական 4 այլ քաղաքներում, այդ թվումՙ Հալլեում: Խաչքարը տեղադրելու շարժառիթը Հայոց ցեղասպանության մեջ գերմանական համապատասխանատվության մասին խոստովանելն է, ասել է Յենայի քաղաքապետ Ալբրեխտ Շրյոթերը: Ինչպես ժամանակին իրազեկել ենք մեր ընթերցողներին, Յենան Գերմանիայում միակ քաղաքն է, որ 2015- ի ապրիլի 24-ին քաղխորհրդի շենքի վրա տեղադրել էր հայոց եռագույնըՙ որպես սգո նշան կիսով չափ խոնարհելով այն: |
