ԵՄ-Ը ԵՎ ԱՄՆ-Ը` ՄԻՋԱԶԳԱՅԻՆ ԴԻՏՈՐԴՆԵՐԻ ՆԱԽՆԱԿԱՆ ԳՆԱՀԱՏԱԿԱՆԻՆ ԱՋԱԿԻՑ Վ. Պ. Եվրոմիության արտաքին քաղաքականության հարցերով բարձր ներկայացուցիչ Քեթրին Էշթոնն ու ԵՄ ընդլայնման եւ եվրոպական հարեւանության քաղաքականության հարցերով հանձնակատար Շտեֆան Ֆյուլեն ի գիտություն են ընդունել փետրվարի 18-ի ընտրությունների նախնական արդյունքները եւ ողջունել Միջազգային ընտրական դիտորդական առաքելության նախնական եզրակացությունները: Երեկ պաշտոնապես հրապարակված համատեղ հայտարարությամբ եվրոպական պաշտոնյաները ողջունել են Հայաստանի իշխանությունների գործադրած ջանքերի առաջընթացը` նախագահի ընտրությունները միջազգային ստանդարտներին համապատասխան անցկացնելու ուղղությամբ, հատկապես ընտրական գործընթացի կատարելագործված վարչարարությունը, թեկնածուների համար քարոզարշավն ազատորեն անցկացնելու հնարավորությունների եւ ընտրացուցակների ավելի բարձր որակի ապահովումը: Միեւնույն ժամանակ, Եվրոմիությունը ակնկալում է որոշ ցցուն մտահոգությունների հարցում հետեւողական լինելու մոտեցում, որը պետք է վերաբերի ծառայողների կողմնակալ դրսեւորումներին, վարչական ռեսուրսի օգտագործման մասին հայտարարություններին, քարոզարշավի ֆինանսավորման հայտարարությունների ոչ հստակ մեկնաբանություններին եւ այլն: Միջազգային դիտորդների նախնական գնահատականների առնչությամբ աջակցություն է հայտնվել նաեւ Միացյալ Նահանգների անունից, մասնավորապես` ի դեմս ԱՄՆ պետքարտուղարության մամուլի խոսնակ Վիկտորիա Նյուլանդի: Վերջինս փետրվարի 19-ի հերթական ճեպազրույցում, պատասխանելով հայաստանյան ընտրությունների մասին հարցին, նշել է, որ ԱՄՆ-ը աջակցում է ԵԱՀԿ ԺՀՄԻԳ-ի նախնական եզրակացություններին առ այն, որ ընտրություններն ընդհանուր առմամբ լավ էին կազմակերպված եւ բնութագրվել են հիմնարար ազատությունների` ներառյալ հավաքների եւ խոսքի ազատության հանդեպ հարգանքով: Դրա հետ մեկտեղ Նյուլանդը նշել է միջազգային դիտորդների այն մտահոգությունները, որոնք կապված են վարչական ռեսուրսի օգտագործման, որոշ կողմնակալության եւ այլ խախտումների հետ, ընդ որում` դրանք կարիք ունեն հետաքննության: | 
