ՀԱՅԿԱԿԱՆ ԱՐՎԵՍՏԸ «ՍՈԹԲԻԻ» ՑՈՒՑԱՀԱՆԴԵՍՈՒՄ Հ. Ծ. Մարտի 4-12-ը «Ճանապարհների խաչմերուկում» խորագրով ցուցահանդես է բացվելու «Սոթբիի» (Լոնդոն) Նյու Բոնդ Սթրիթ հասցեում գտնվող շենքի դահլիճներում, որտեղ ցուցադրվելու է Կովկասի եւ Կենտրոնական Ասիայի ժամանակակից արվեստը: Այս մասին տեղեկացնում է «Արմինյն միրոր-սփեքթեյթր» շաբաթաթերթի հունվարի 19-ի համարը: Ներկայացվելու են Հայաստանի, Ադրբեջանի, Վրաստանի, Ղազախստանի, Ղրղզստանի, Տաջիկստանի եւ Ուզբեկստանի արվեստագետների մոտ 50 ստեղծագործություններ: Ուշադրության կենտրոնում են լինելու հիմնականում դիսիդենտ եւ սոցիալիստական ռեալիզմի ներկայացուցիչների գործերըՙ սկսած անցյալ դարի 60-ական թվականներից մինչեւ մեր օրերը: «Կովկասյան եւ Կենտրոնական Ասիայի երկրները արագ տեմպերով առաջ են գնում: Տարածաշրջանը չափազանց հետաքրքրական է եւ հարուստ պատմություն ու մշակույթ ունի: Այնտեղ կան աչքի ընկնող, յուրահատուկ արվեստագետներ», նշել է այս առթիվ «Սոթբիի» ռուսական արվեստի բաժնի վարիչ Ջո Վիկերին: | 
