ԲՐԻՏԱՆԱԿԱՆ ՓԱՌԱՏՈՆԻ ԿՐԹԱԿԱՆ ԾՐԱԳԻՐԸ Բրիտանական խորհրդի, Երեւանում բրիտանական դեսպանատան եւ «Արմենտել» ընկերության կազմակերպած Բրիտանական ֆիլմերի փառատոնի շրջանակում մեկնարկել է կրթական ու երիտասարդական ծրագիրը : Մարտի 4-ին ծրագիրը սկսվել է «Թումո» ստեղծարար տեխնոլոգիաների կենտրոնում Ալֆրեդ Հիչքոքի «Կենվորը» ֆիլմի ցուցադրությամբ, որից հետո տեղի են ունեցել քննարկում եւ վարպետության դասընթաց միջազգային կինոուղեցույցի խմբագիր Յան Հեյդն Սմիթի մասնակցությամբ: Փառատոնի մյուս ֆիլմերը նույնպես կցուցադրվեն «Թումո» կենտրոնում: Ցուցադրությունը բաց կլինի կենտրոնի սաների համար: Իսկ մարտի 3-11-ը, «Ոսկե ծիրան» կինոփառատոնի աջակցությամբ, կինոքննադատ Յան Հեյդն Սմիթն անցկացնում է կինոգրախոսության դասընթաց: Բրիտանական ֆիլմերի 11-րդ փառատոնը Երեւանում մեկնարկեց մարտի 2-ից, պաշտոնական ծրագիրը կշարունակվի մինչեւ մարտի 11-ը, այնուհետեւ ֆիլմերը կցուցադրվեն մարզերում ու զորամասերում: | 
