ԿՐԿԻՆ «Carrefour»-Իՙ ՀԱՅԱՍՏԱՆ ԺԱՄԱՆՄԱՆ ՄԱՍԻՆ Արման Փինարբասի, Հայ-ֆրանսիական գործարարության ակումբի նախագահ Հայաստանում Ֆրանսիայի դեսպանությունից երեկ ստացանք Հայ-ֆրանսիական գործարարության ակումբի նամակը Հայաստանի Հանրապետության վարչապետ Տիգրան Սարգսյանին, որտեղ մասնավորապես ասված է. «Հարգելի պարոն վարչապետ, Հայ-ֆրանսիական գործարարության ակումբը, որը հիմնադրվել է Հայաստանում Ֆրանսիայի դեսպան Անրի Ռենոյի նախաձեռնությամբ 2011 թ.-ի աշնանը, իր շուրջն է համախմբում Հայաստանում ներկայացված խոշորագույն ֆրանսիական, ինչպես նաեւ Ֆրանսիայում իրենց գործունեությունը ծավալող հայկական ընկերություններին: Ակումբի գործունեությունը միտված է մեր իրավասությունների շրջանակներում ներկայացնելու անդամակցող ընկերությունների շահերը պետական մարմիններին, ինչպես նաեւ նպաստելու երկու երկրների միջեւ տնտեսական, առեւտրային, գիտատեխնիկական կապերի զարգացմանը: 2012 թ.-ի դեկտեմբեր ամսից մեր ակումբի անդամ է նաեւ «Carrefour Armenia» ընկերությունը: Վստահ ենք, որ «Carrefour»-ի ժամանումը շոշափելիորեն կնպաստի Հայաստանի տնտեսության զարգացմանը, մասնավորապես որակյալ աշխատատեղերի ստեղծմանը եւ սպառողներին մատուցվող ծառայությունների բարելավմանը թե՛ որակի բարձրացման, թե՛ ընտրության բազմազանության տեսանկյունից: Այդ իսկ պատճառով Հայ-ֆրանսիական գործարարության ակումբը կարեւորում է նմանատիպ խոշոր ներդրումային ծրագրի մոտալուտ իրականացումը Հայաստանում: Հաշվի առնելով այս հանգամանքըՙ հույս ունենք, որ Հայաստանի Հանրապետության կառավարությունը իր լիարժեք աջակցությունը կբերի այս ծրագրի հաջող գործարկմանըՙ ի նպաստ տնտեսության եւ հայ ժողովրդի: Տեղյակ լինելով Ձեր նվիրվածությանը այս ծրագրի հաջողության գործում` կանխավ շնորհակալություն ենք հայտնում «Carrefour» ընկերությանՙ Հայաստանում հաստատման ուղղությամբ Ձեր գործադրած ջանքերի համար»: | 
