ՀԱՅԿԱԿԱՆ ԿՅԱՆՔԻ ՎԵՐԱԿԱՆԳՆՈՒՄՆ ԱՆԱՏՈԼԻԱՅՈՒՄ ՊԻՏԻ ԱՄՐԱԳՐՎԻ ԹՈՒՐՔԻԱՅԻ ՍԱՀՄԱՆԱԴՐՈՒԹՅԱՆ ՆՈՐ ՏԱՐԲԵՐԱԿՈՒՄ ԱՆԱՀԻՏ ՀՈՎՍԵՓՅԱՆ, Գերմանիա Այսօր, հունիսի 8-ին Ստամբուլի «Թաքսիմ Հիլլ» հյուրանոցում կկայանա «Ծպտյալ եւ մահմեդականացած հայեր. ոչ մահմեդականների քաղաքացիության իրավունքը» թեմայով մեկօրյա կոնֆերանս: Ժամը 10.30-18.15 հրավիրված կոնֆերանսի «Նոր սահմանադրության նախապատրաստական գործընթացը. ոչ մահմեդականների քաղաքացիության իրավունքը» վերնագրյալ առաջին բաժնի քննարկմանը մասնակցում են Էրոլ Դորան, Օսման Ջանը, Ուֆուկ Ուրասը, Ռոբեր Քոփթաշը («Ակօս»), Բեքիր Բերաթ Էոզիփեկը: Հանդիսավարն է Նուրջան Քայան: Երկրորդ բաժինը, որ վերնագրված է«Ծպտյալ եւ մահմեդականացած հայեր», վարելու է Էրդալ Դողանը: Մասնակցում են Էոմեր Ֆարուք Գերգելիօղլուն, Բագրատ Էստուքյանը, Միհրան Փրկիչը, Չենգիզ Աքթարը: «Սփյուռքահայերի Թուրքիա վերադարձի պայմանները եւ քաղաքացիության իրավունքը» վերնագրյալ երրորդ բաժինը վարելու է Չենգիզ Ալթանը: Մասնակցում են Եդվարդ Տանձիկյանը, Մադլեն Վարդյանը, Նիկոլաս Դավիդյանը, Թաթյոս Բեբեքը, Գյուլեր Յիլդիզը: Բոխումի «Սփյուռք եւ ցեղասպանություն» ինստիտուտի տնօրեն Միհրան Դաբաղի նախաձեռնած եւ փաստաբան Էրդալ Դողանի կազմակերպած կոնֆերանսն անցկացվում է թուրքական «Ընդդեմ ռասիզմի եւ ազգայնամոլության» կազմակերպության հովանու ներքո: Միհրան Դաբաղի գնահատմամբՙ Թուրքիայում ներողության եւ հաշտության հռետորաբանությունից անդին առաջին անգամ Անատոլիայում ծպտյալ հայերի, հայկական կյանքի վերականգման իրավական հարցերն են ընդհանուր քննարկման առարկա դառնում»: «Սփյուռք եւ ցեղասպանություն» ինստիտուտի տնօրենի համար առաջնային է «ոչ միայն անցյալի համաձայնագրերի վրա հիմնված, այլեւ ներկա դիսկուրսին համապատասխանՙ Անատոլիայում հայկական կյանքի վերականգնումը»: Նրա մատուցմամբՙ ծպտյալ հայերի, ինչպես նաեւ վերադառնալու պատրաստ հայերի միջոցով կարելի է «հայկական կյանքի վերականգման գործընթացի սկիզբ դնել: Այսինքնՙ պատասխանատվություն ցեղասպանության հետեւանքների մեջ ապրող հայ մնացորդաց հանդեպ»: | 
