ԼԱՎԱԳՈՒՅՆԸ ՍԵՐԳԵՅ ՄՈՎՍԻՍՅԱՆԻ ԱՐԴՅՈՒՆՔՆ Է Խանտի Մանսիյսկում մեկնարկել է արագ շախմատի աշխարհի առաջնությունը: Շվեյցարական մրցակարգով կանցկացվի 15 տուր: Հայաստանից մրցաշարին մասնակցում են Վլադիմիր Հակոբյանը, Սերգեյ Մովսիսյանը, Գաբրիել Սարգսյանն ու Աշոտ Նադանյանը: Անցկացրած 7 տուրից հետո հայ շախմատիստներից լավագույն արդյունքն ունի Սերգեյ Մովսիսյանը, որը վաստակել է 4,5 միավոր: Նա հաղթել է Պավել Պոտապովին, Դմիտրի Գորդիեւսկուն եւ Վլադիսլավ Արտեմեւին, հաշտություն է կնքել Կատերինա Լահնոյի, Իգոր Կուռնոսովի եւ Դմիտրի Անդրեյկինի հետ: Միակ պարտությունը Մովսիսյանը կրել է 2-րդ տուրումՙ զիջելով Սալեհ Սալեմին: Վլադիմիր Հակոբյանն ունի 4 միավոր: Նա հաղթել է Իլյա Սմիրինին ու Եվգենի Նայերին, հաշտություն է կնքել Ռոդրիգո Վասգուեսի, Կատերինա Լահնոյի, Վադիմ Զվյագինցեւի, Էլթայ Սաֆարլիի հետ: 7-րդ տուրում Հակոբյանը պարտվեց Իվան Չեպարինովին: Գաբրիել Սարգսյանն ունի 3,5 միավոր: Նա մրցաշարը սկսեց Բայարսարխան Գունդավայի եւ Ղադիր Հուսեյնովի նկատմամբ տոնած հաղթանակներով, ապա 2 անընդմեջ պարտություն կրեց Ֆրանսիսկո Վալյեխոյից եւ Էլթայ Սաֆարլիից: Իսկ վերջին 3 տուրերում Գաբրիելը հաշտություն կնքեց Էշան Ղաեմիի, Սալեհ Սալեմի եւ Վլադիսլավ Արտեմեւի հետ: Աշոտ Նադանյանը վաստակել է 2 միավոր: Նա տոնել է 2 հաղթանակ, 5 պարտիայում պարտվել է: 7 տուրից հետո 6,5 միավորով աղյուսակը գլխավորում է Յան Նեպոմնյաչնին: 5,5 միավորով 2-րդ տեղում Ալեքսեյ Դրեեւն է: 5-ական միավոր ունեն Շահրիյար Մամեդյարովը, Իվան Չեպարինովը, Իլդար Խայրուլինն ու Դմիտրի Անդրեյկինը: | 
