«ՇՈՇԱՓԵԼԻՔԻ ԸՆԿԱԼՈՒՄ» ԵՐԵՎԱՆԻ ԲԺՇԿԱԿԱՆ ՀԱՄԱԼՍԱՐԱՆՈՒՄ Հ.Ծ. Երեւանի Մխիթար Հերացու անվան պետական բժշկական համալսարանում մայիսի 23-ին կայացել է Սկրիպսի (Scrips) հետազոտական ինստիտուտի պրոֆեսոր եւ Հովարդ Հյուգս բժշկական ինստիտուտի հետազոտող Արտեմ Փաթափությանի «Շոշափելիքի ընկալումը: Ինչպես ենք զգում ջերմաստիճանն ու ճնշումը» խորագրով դասախոսությունը, որի ընթացքում գիտնականը ներկայացրել է շոշափելիքի ընկալման մեխանիզմները եւ այդ ոլորտում իր կատարած աշխատանքները, խոսել այն մասին, որ ուսումնասիրելով մեխանիկական ընկալման մոլեկուլային մեխանիզմները, նա բացահայտել է իոնային անցուղիների մի նոր ընտանիքՙ Պիեցո (Piezo) անցուղիները, որոնք ակտիվանում են մեխանիկական գրգռումից: Դասախոսության ավարտին նա պատասխանել է ներկաների բազմաթիվ հարցերին եւ հիացմունք հայտնել ուսանողներիՙ թեմայի շուրջ ունեցած խորը գիտելիքների համար: Տեղեկացնենք, որ Արտեմ Փաթափությանը որդին է սփյուռքահայ հայտնի գրող Սարգիս Վահագնի եւ վաստակավոր ուսուցչուհի Հայկուհի Փաթափությանի: | 
