ՎՐԱՍՏԱՆԻ ԱԴՐԲԵՋԱՆՑԻ ՆԱԽԱՐԱՐԸ` ԻՎԱՆԻՇՎԻԼՈՒ ՈՐՈՆՈՒՄՆԵՐԻ ԱՌԱՐԿԱ Վ. ՊՈՂՈՍՅԱՆ Ստալինյան ժամանակներում պաշտամունքը, պարտադրված ու համատարած, անհեթեթության բոլոր սահմաններն անցել էր: Մերօրյա նման անհեթեթության օրինակն էլ հարեւան երկրի նախկին նախագահի` Հեյդար Ալիեւի պաշտամունքն է, որ աշխարհով մեկ տեղադրված ու տեղադրվող արձաններից զատ ավելի ցցուն դրսեւորումներ էլ է ունենում: Ընդ որում, եթե Մեքսիկայում տեղադրում են Հեյդար Ալիեւի արձանը, հետո էլ մտքափոխվում`չիմանալով ուր խցկել այդ «ստեղծագործությունը», մեր երկու հարեւանները պաշտամունքային սեղանին փոխադարձ ռեւերանսներով են հանդես գալիս: Մայիսի 8-ին Վրաստանի վարչապետ Բիձինա Իվանիշվիլին, Ադրբեջանի նավթային պետական ընկերության նախագահ Ռովնագ Աբդուլաեւը եւ Ադրբեջանի մշակույթի ու զբոսաշրջության նախարար Աբուլֆաս Գարաեւը Վրաստանի Ռուսթավ քաղաքում Հեյդար Ալիեւի անվան պուրակ ու հուշարձան են բացել: Իվանիշվիլին ամենապրակտիկ դիրքերից հիշեցրել է, որ հենց Հեյդար Ալիեւի շնորհիվ է «ադրբեջանական նավթը հոսում Վրաստանի տարածքով»: Դրան արդեն, ըստ վրացական լրատվամիջոցների, հետեւել է կենաց խոստովանություն, թե «Հեյդար Ալիեւն ադրբեջանական բաժինը զիջել է հօգուտ Վրաստանի, քանի որ բարձր էր գնահատում ադրբեջանցի եւ վրաց ժողովուրդների բարեկամությունը»: Սա էլ հուշարձան բացելու եթե ոչ պատճառը, ապա բացատրությունը... Մնացյալը, ինչպես եւ ասվածը, վրաց նախկին ղեկավարների խոսքերից ոչ մի կերպ չի տարբերվում, թե Ադրբեջանը Վրաստանի ռազմավարական գործընկերն է: Երեւի դրա համար էլ Իվանիշվիլին իրադարձության առիթով Վրաստան այցելած ադրբեջանական լրատվամիջոցներին ասել է, թե նախարարի ադրբեջանցի թեկնածու է փնտրում: «Խոստացել եմ, որ մեր հայրենակից ադրբեջանցին կզբաղեցնի վարչապետի խորհրդականի կամ օգնականի պաշտոնը, բայց որոշել ենք հեռուն գնալ եւ մեր ադրբեջանցիներից մեկին նախարար նշանակել», ադրբեջանական մամուլին հայտարարել է Իվանիշվիլին: Բնավ էլ վատ մտադրություն չէ, այն էլ ոչ միայն Հեյդար Ալիեւի պատվին, այլեւ սեփական երկրի քաղաքացու, որպիսին Վրաստանում ապրող ադրբեջանցիներն են: Սակայն եթե հաշվի առնենք, որ մի հայ արդեն իսկ եղել է Վրաստանի նախագահի խորհրդական, եւ ադրբեջանցու պարագայում դժվար թե նախարարի աթոռին հայտնված մառնեուլցին իրեն հարմար տեղում զգա`առանց Վրաստանի նախագահի հայ խորհրդականի դերակատարությունը իրականացնելու: | 
