ԱՆԻ ՍԱՐԳՍՅԱՆԸ ՑՈՒՅՑ ՏՎԵՑ 4-ՐԴ ԱՐԴՅՈՒՆՔԸ Պերուի մայրաքաղաք Լիմայում ընթացող ծանրամարտի աշխարհի երիտասարդական առաջնության հերթական օրը մինչեւ 69 կգ քաշային կանանց մրցումներին մասնակցեց Ռուսաստանը ներկայացնող Անի Սարգսյանը: Նա երկամարտի 209 կգ (90+119) արդյունքով 9 մասնակիցների մեջ գրավեց 4-րդ տեղը: Անին պոկում վարժության 2 մոտեցումները հաջող կատարեցՙ 90 կգ արդյունքով գրավելով 5-րդ տեղը: Նա ավելի հաջող ելույթ ունեցավ հրում վարժությունումՙ 119 կգ-ով զբաղեցնելով 4-րդ հորիզոնականը: Հայ մարզուհին ի վիճակի չէր խառնվելու մեդալների համար մղվող պայքարին: Երկամարտի 245 կգ (115+130) արդյունքով աշխարհի չեմպիոնուհի հռչակվեց չինացի Քսյինուե Վանգը: Արծաթե մեդալը նվաճեց ղազախուհի Ժազիրա Ժապարկուլը, որը երկամարտում ցույց տվեց 240 կգ (105+135) արդյունք: Բրոնզե մրցանակակիր դարձավ թունիսցի Գհադա Հասինըՙ 222 կգ (101+121): | 
