ՄԱՐԱԼ ՏԷՐ-ՊՕՂՈՍԵԱՆ ԿԸ ՀԻԱՑՆԷ ԻՐ ԵՐԱԶԱՅԻՆ ԿԱՊՈՅՏ ՔԱՂԱՔԻ ԵՒ ԲԱԶՄԱԶԳ ՄՇԱԿՈՅԹԻ ՍՏԵՂԾԱԳՈՐԾՈՒԹԻՒՆՆԵՐՈՎ ՀԱՄՕ ՄՈՍԿՈՖԵԱՆ, Բէյրութ Վերջերս Բէյրութի գեղարուեստի հեղինակաւոր «Ալուան» ցուցասրահին մէջ իր ստեղծագործութիւններով հանդէս եկաւ լիբանանահայ գեղանկարչութեան երիտասարդ եւ տաղանդաւոր ներկայացուցիչներէն Մարալ Տէր-Պօղոսեանը: Դուստրը հանրածանօթ քանդակագործուհի Կիւլէն եւ գեղանկարիչ Շահէ Տէր-Պօղոսեաններու: Ան ծնած է 1976 թուականինՙ Փարիզի մէջ: Այժմ կը դասախօսէ Լիբանանեան համալսարանի գեղարուեստի ինստիտուտին մէջ: 2001 թուականին յատուկ թոշակ ստացած է Մշակոյթի զարգացման միջազգային հիմնադրամէն (IFPC), UNESCO Aschberg Fund-էն եւ Վիեննայի կառավարութենէն որպէս Վիեննայի բնակչուհի-արուեստագիտուհի: Առաջին անհատական ցուցահանդէսը տեղի կունենայ Բէյրութի գերմանական «Գէօթէ» հաստատութեան մէջՙ 2002 թուականին: Յաջորդ տարի Մարալ Տէր Պօղոսեանի անհատական երկրորդ ցուցահանդէսը տեղի կունենայ Անթիլիասի Կիլիկեան թանգարանին մէջՙ Արամ Ա. կաթողիկոսի հովանաւորութեամբ: Երազային կապոյտ շղարշի տակ թաքնուած Բէյրութի երանգապնակի վարպետուհին, 2011 թուականին կը ներկայացնէ իր ստեղծագործութիւնները Թուզլայի մէջՙ Բոսնիա-Հերցեգովինա, INTERBIFEP XIV ցուցահանդէսի ընդմէջէն: Նախապէս ալ իր պաստառները գեղարուեստասէր հանրութեան եւ արուեստի քննադատներուն կը «հրամցուին» 2006-2008 Սըրսոքներու թանգարանի աշնանային սենեկային ցուցահանդէսներուն: Նաեւՙ 2001-2005 թուականներուն երեք անգամ մասնակցած է Վիեննայի, ապաՙ Լիոնի ու Ժընեւի, Շարժայի (Դուբայ) գեղանկարչական աւանդական միջոցառումներուն, արժանանալով ականաւոր մասնագէտներու գնահատականին: Մասնաւորապէս «Ինքնութիւններ» գեղանկարներու շարանին մէջ մասնագէտներ նկատած են, որ Մարալ քաղաքակրթութիւններու մշակոյթները կը հիւսէՙ ինչպէս երկրաչափական արտայայտութիւններով գորգ մը... «Գեղարուեստի մօտեցումս կ"արտացոլացնէ բազմամշակութային խաւերը ինքնութեանս: Բանաստեղծական մօտեցումով ստեղծագործութիւններս կ"արտայայտեմ մթնոլորտէ մը, ուր բազմաթիւ մշակոյթներ եւ աւանդոյթներ համատեղ կ"ապրին: Երբեմն անոնք կը միաձուլուին, ուրիշ անգամներ ալ կը հակադրուին: Երբեմն կ"ընդելուզուի կովկասեան եւ արեւելեան գորգերու մանրամասներով: Անոնք կը ներկայացուին հայկական եւ պարսկական մանրանկարչութեան պատկերներով: Մշակոյթները միահիւսուած են, ինչպէս որ գորգի մը գոյները իրարու...: Գորգերու եւ մանրանկարչութեան պատկերներու ներկայացումը քաղաքի տեսարանին վրայՙ իմ արուեստս է ինքնութիւն տալու այս բնակելի տարածքին, որ կորսնցնելու վրայ է իր ինքնութիւնը...»,- կը բացատրէ գեղանկարչուհին: Յոյսով ենք, որ ինչպէս Լիբանանի, այնպէս ալ արաբական աշխարհի ու միջազգային գեղարուեստի երկնակամարին վրայ Մարալ Տէր-Պօղոսեանի աստղը պիտի փայլի իր բոլոր երանգներով, ի փառս հայ գեղարուեստի դարաւոր աւանդոյթներուն: | 
