ԼԵՎՈՆ ԱՐՈՆՅԱՆՆ ԻՐ ՎԱՐԿԱՆԻՇՈՎ ԱՇԽԱՐՀՈՒՄ ՄՆՈՒՄ Է 3-ՐԴԸ ՖԻԴԵ-ն հրապարակել է շախմատիստների դասակարգման նոր ցուցակը, որում նախորդ ամսվա համեմատ փոփոխություններն աննշան են: Լեւոն Արոնյանը պահպանել է 2809 վարկանիշը եւ 3-րդ հորիզոնականը: Լավագույն տասնյակում տեղ զբաղեցրած շախմատիստներից միայն աշխարհի չեմպիոն Վիշվանաթան Անանդի վարկանիշն է փոփոխվելՙ աճելով 4-ով: Դասակարգման ցուցակը 2872 ռեկորդային վարկանիշով շարունակում է գլխավորել Մագնուս Կառլսենը: 2-րդ տեղում Վլադիմիր Կրամնիկն է (2810): 4-րդ հորիզոնականը զբաղեցնում է Թեյմուր Ռաջաբովը (2793), որին հաջորդում են Սերգեյ Կարյակինը (2786), Վիշվանաթան Անանդը (2784), Վեսելին Թոփալովը (2771), Հիկարու Նակամուրան (2767), Շահրիյար Մամեդյարովը (2766) եւ Ալեքսանդր Գրիշչուկը (2764): 100 ուժեղագույն շախմատիստների ցանկում ընդգրկված են եւս 5 հայ շախմատիստներ: Արոնյանից հետո լավագույն ցուցանիշն ունի Վլադիմիր Հակոբյանը, որը 2704 վարկանիշով պահպանել է 45-րդ տեղը: Սերգեյ Մովսիսյանը թեեւ պահպանել է վարկանիշը (2695), սակայն 54-րդ տեղից նահանջել է 60-րդ հորիզոնական: Իսկ ահա Գաբրիել Սարգսյանը պահպանելով վարկանիշը (2666), 80-րդ տեղից բարձրացել է 78-րդ հորիզոնական: Մեկ հորիզոնականով բարձրացել է վարկանիշը (2663) պահպանած Տիգրան Պետրոսյանը, որը 81-րդն է: Տիգրան Ղարամյանը վարկանիշը (2660) նվազեցրել է 1-ով, սակայն պահպանել է 84-րդ տեղը: Կանանց վարկանիշային ցուցակի առաջատարը Հուդիթ Պոլգարն էՙ 2696: Լավագույն տասնյակում են նաեւ Հոու Յիֆանը (2617), Համպի Կոներուն (2597), Աննա Մուզիչուկը (2585), Չժաո Սյուեն (2565), Նանա Ձագնիձեն (2554), Կատերինա Լահնոն (2547), Մարի Սեբագը (2537), Նադեժդա Կոսինցեւան (2531) եւ Անտուանետա Ստեֆանովան (2530): Հայաստանը ցուցակում ներկայացնում են Էլինա Դանիելյանն ու Լիլիթ Մկրտչյանը: Երկուսն էլ պահպանել են վարկանիշները: Դանիելյանը 2466 վարկանիշով 29-րդ տեղից նահանջել է 30-րդ հորիզոնական, իսկ Մկրտչյանը 2458 վարկանիշով 34-րդ տեղից բարձրացել է 33-րդ հորիզոնական: ՖԻԴԵ-ի անդամ երկրների ցանկում Հայաստանը միջին վարկանիշով (2661) 6-րդն է: Առջեւում են Ռուսաստանը (2747), Ուկրաինան (2704), Չինաստանը (2669), Ֆրանսիան (2663) եւ Հունգարիան (2661): Ադրբեջանը 2653 վարկանիշով 8-րդ տեղում է, Վրաստանը (2594) 16-րդն է: | 
