ՄԱՆԿԱՎԱՐԺԱԿԱՆԻ ՊԱՏՄԱՎԱՎԵՐԱԳՐՈՒԹՅՈՒՆԸ ԵՌԱԼԵԶՈՒ ԱԼԲՈՄՈՒՄ Օրերս լույս են տեսել Մանկավարժական համալսարանի պատմությունն ու տարեգրությունը ներկայացնող ալբոմի անգլերեն եւ ռուսերեն տարբերակները: Համալսարանի 90-ամյակին նվիրված ալբոմում արխիվային նյութերի, պատկերազարդ լուսանկարների համադրմամբ կարելի է ծանոթանալ հայ գրերի ստեղծմանը, միջնադարյան Հայաստանում նշանավոր դպրոցների եւ վանական համալսարանների կազմակերպմանը, Մանկավարժական համալսարանի հիմնադրման, գործունեության առաջին տարիների պատմությանը, ինչպես նաեւ Հայրենական մեծ պատերազմին եւ Արցախյան հերոսամարտին համալսարանի մասնակցությանը: Ընթերցողն ալբոմի միջոցով կարող է ճանաչել նաեւ բուհի անվանի շրջանավարտներին: Ալբոմի առաջին էջում ՀՀ նախագահ Սերժ Սարգսյանի ուղերձն է եւ Ն.Ս.Օ.Տ.Տ. Գարեգին Բ Ամենայն հայոց կաթողիկոսի օրհնությունը` Մանկավարժականի հիմնադրման 90-ամյակի առթիվ: «Հայերեն, ռուսերեն եւ անգլերեն տարբերակներով եռալեզու ալբոմը նպատակ ունի համալսարանի մանկավարժական ժառանգությունը դարձնել սերունդների սեփականությունը, ներկայացնել բուհի պատմության բոլոր շրջանները` հիմնադրումը, զարգացման փուլերը, անցած ճանապարհը, ներկան եւ հեռապատկերը»,- ասաց աշխատակազմի եւ միջազգային համագործակցության գծով պրոռեկտոր, իրավաբանական գիտությունների թեկնածու, դոցենտ Արա Երեմյանը : Նշենք, որ համալսարանի պրոֆեսորադասախոսական կազմի ջանքերով պատրաստված ալբոմի հայերեն տարբերակը հրատարկվել էր դեռեւս 2012 թվականի տարեվերջին: | 
