ՅՈՒՐԱ ՄՈՎՍԻՍՅԱՆԸ ՎԵՐՍԿՍԵԼ Է ՄԱՐԶՈՒՄՆԵՐԸ Մոսկվայի «Սպարտակն» ուսումնամարզական վերջին հավաքն է սկսել Իսպանիայի Մարբելիա քաղաքում: Հայաստանի հավաքականի հարձակվող Յուրա Մովսիսյանը, որ վնասվածքի պատճառով չէր մասնակցել «Սպարտակի» ստուգողական մի քանի հանդիպումների, վերսկսել է մարզումները: Նա արդեն մարզվում է թիմի ֆուտբոլիստների հետ: «Սպարտակի» գլխավոր մարզիչ Վալերի Կարպինն իր դժգոհությունն է հայտնել, որ վնասվածքների պատճառով առայժմ չի կարողացել գործի մեջ տեսնել հարձակվողներին. «Ընդհանուր առմամբ ամեն ինչ նորմալ է ընթանում: Հիասթափեցնում է միայն այն, որ մինչ օրս չենք կարողացել գործի մեջ տեսնել այն հարձակվողներին, որոնց կցանկանայինք խաղացնել: Նրանցից շատերը վնասվածքներ ունեն: Օրինակ Էմենիկեն Աֆրիկայի գավաթի մրցաշարին մասնակցելու պատճառով ընդհանրապես չաշխատեց մեզ հետ: Մովսիսյանը վնասվածքի պատճառով օրումեջ էր մարզվում: Ուորիսը 2 վնասվածք ստացավ հավաքների ընթացքում: Ստացվում է, որ 3 հարձակվողներից ոչ ոք լիարժեք նախապատրաստական փուլ չանցավ»: Ինչ խոսք, Յուրա Մովսիսյանի մարզավիճակն անհանգստացնում է նաեւ Հայաստանի ազգային հավաքականի գլխավոր մարզիչ Վարդան Մինասյանին: Հայտնի է, որ մարտի 26-ին ՀՀ հավաքականը Երեւանում աշխարհի առաջնության ընտրական մրցախաղում հյուրընկալելու է Չեխիայի ընտրանուն: Այդ խաղում Յուրա Մովսիսյանի կարիքը շատ է զգացվում: Ուստի շատ կարեւոր է, որ հայ ֆուտբոլիստը շուտ վերականգնվի ստացած վնասվածքից ու որքան հնարավոր է լավ մարզավիճակ ձեռք բերի: | 
